மனநல அறிவாற்றல் (Mental Health Literacy)

மனநல அறிவாற்றல் என்பது மனநலம் குறித்து சரியான புரிதலைப் பெறுவது, மனநலத்தைப் பாதுகாத்து மேம்படுத்துவது, பிரச்சினைகளை ஆரம்பத்திலேயே அடையாளம் காண்பது மற்றும் தேவைப்படும் போது சரியான உதவியைப் பெறுவது ஆகியவற்றைக் குறிக்கிறது.

மனநல அறிவாற்றலில் என்னென்ன அடங்கும்?

• நல்ல மனநலத்தை எவ்வாறு வளர்த்துக் கொண்டு தொடர்ந்து பேணுவது.
• மனநோய்கள் குறித்த எதிர்மறையான எண்ணங்கள், தவறான புரிதல்கள் மற்றும் சமூக முத்திரை (stigma) ஆகியவற்றைக் குறைத்தல்.
• பல்வேறு மனநலக் கோளாறுகள், அவற்றின் அறிகுறிகள் மற்றும் சிகிச்சைகள் குறித்து அறிந்து கொள்வது.
• தனக்கோ அல்லது குழந்தைக்கோ தேவையான போது பொருத்தமான மனநல நிபுணரை எவ்வாறு அணுகுவது என்பதை அறிந்து கொள்வது.

மனநலப் பிரச்சினை மற்றும் மனநலக் கோளாறு – இரண்டும் ஒன்றல்ல

கடுமையான மன அழுத்தம் அல்லது எதிர்பாராத வாழ்க்கை நிகழ்வுகள் ஒருவரின் வழக்கமான சமாளிக்கும் திறனைப் பாதிக்கலாம். குடும்பப் பிரச்சினைகள், தேர்வு அழுத்தம், உறவுப் பிரச்சினைகள், வேலை அழுத்தம், திடீர் இழப்பு போன்றவை தற்காலிகமாக மனச்சோர்வு, பதட்டம் அல்லது தூக்கப் பிரச்சினைகளை ஏற்படுத்தலாம்.

இத்தகைய சூழ்நிலைகளில் counselling, உளவியல் உதவி அல்லது மனநல மருத்துவரின் ஆலோசனை உதவியாக இருக்கலாம்.

ஆனால் அறிகுறிகள் தொடர்ந்து நீடித்து, ஒருவரின் சிந்தனை, உணர்வுகள், நடத்தை, உறவுகள் அல்லது அன்றாட செயல்பாடுகளில் குறிப்பிடத்தக்க பாதிப்பை ஏற்படுத்தும்போது, அது ஒரு மனநலக் கோளாறாக இருக்கலாம். அத்தகைய நிலையில் தொழில்முறை மதிப்பீடும் சிகிச்சையும் தேவைப்படலாம்.

உதாரணமாக: Anxiety Disorder, Depressive Disorder, OCD போன்றவை.

மனநலத்தைப் பாதிக்கும் காரணிகள்

மனநலம் ஒருவரின் தனிப்பட்ட முயற்சியால் மட்டுமே தீர்மானிக்கப்படுவதில்லை.

• உயிரியல் பண்புகள்
• உறவுகள்
• வாழ்க்கை அனுபவங்கள்
• பாகுபாடு மற்றும் சமூக அனுபவங்கள்
• சுற்றுச்சூழல் மற்றும் சமூகப் பாதுகாப்பு
• பொருளாதார நிலை மற்றும் சமூக அமைப்புகள்

எனவே மனநலப் பிரச்சினைகளை வெறும் “நேர்மறையாகச் சிந்தியுங்கள்” அல்லது “மனதளவில் வலிமையாக இருங்கள்” என்று மட்டும் எளிமைப்படுத்தக் கூடாது.

உங்கள் குழந்தையுடன் மனநலம் குறித்து எப்படிப் பேசுவது?

உங்கள் குழந்தையுடன் மனநலம் குறித்து பேசுவதற்கு நீங்கள் மனநல நிபுணராக இருக்க வேண்டிய அவசியமில்லை. சாதாரணமான, அக்கறையுள்ள உரையாடலே ஒரு நல்ல தொடக்கமாக இருக்கலாம்.

எல்லா கேள்விகளுக்கும் உங்களிடம் பதில் இருக்க வேண்டிய அவசியமில்லை. கவனமாகக் கேட்பது, புரிந்துகொள்ள முயற்சிப்பது, திறந்த மனதுடன் இருப்பது மற்றும் அக்கறையுடன் அணுகுவது முக்கியம்.

7 எளிய வழிகள்

1. தொடர்ந்து பேசுங்கள்: பிரச்சினை ஏற்பட்ட பிறகு மட்டும் பேசாமல், தொடர்ந்து குழந்தையுடன் உரையாடுங்கள்.
2. அமைதியாகவும் பொறுமையாகவும் இருங்கள்: குழந்தை உடனடியாகப் பேசவில்லை என்றால் கட்டாயப்படுத்த வேண்டாம்.
3. எளிய இயல்பான வார்த்தைகளைப் பயன்படுத்துங்கள்: “anxiety/depression symptom” போன்ற labels பயன்படுத்துவதற்குப் பதிலாக, “சமீபத்தில் நீ சற்று கவலையாக இருப்பது போலத் தெரிகிறது. ஏதாவது உன்னைத் தொந்தரவு செய்கிறதா?” என்று கேட்கலாம்.
4. சரியான நேரத்தையும் இடத்தையும் தேர்வு செய்யுங்கள்: அமைதியான இடத்தில், நடைப்பயிற்சி செய்யும்போதோ அல்லது ஒன்றாக ஏதாவது செய்யும்போதோ பேசுவது உதவியாக இருக்கலாம்.
5. ஆர்வத்துடனும் அனுதாபத்துடனும் கேளுங்கள்: “நீ ஏன் இப்படிச் செய்கிறாய்?” என்பதற்குப் பதிலாக, “என்ன நடக்கிறது என்பதை நான் புரிந்துகொள்ள விரும்புகிறேன்” என்று சொல்லலாம்.
6. முதலில் கேளுங்கள்; உடனடியாகத் தீர்வு சொல்ல வேண்டாம்: குழந்தை கூறுவதை முழுமையாகக் கேட்க முயற்சி செய்யுங்கள்.
7. தீர்வில் குழந்தையையும் இணைத்துக் கொள்ளுங்கள்: “இதற்கு நாம் என்ன செய்யலாம் என்று நீ நினைக்கிறாய்?” அல்லது “உனக்கு இப்போது என்ன உதவி தேவை என்று நினைக்கிறாய்?” என்று கேட்கலாம்.

குழந்தையின் மனநலத்தில் மாற்றம் ஏற்பட்டிருப்பதை எப்படிக் கவனிப்பது?

பெற்றோர்கள் தங்கள் குழந்தையை நன்கு அறிந்திருப்பதால், குழந்தையின் வழக்கமான நடத்தையில் ஏற்படும் குறிப்பிடத்தக்க மாற்றங்களை முதலில் கவனிப்பவர்கள் அவர்களாக இருக்கலாம்.

எந்த மாற்றத்தையும் உடனடியாக மனநோய் என்று முடிவு செய்ய வேண்டாம். முதலில் “என்ன மாற்றம் ஏற்பட்டுள்ளது? ஏன் ஏற்பட்டிருக்கலாம்?” என்று புரிந்துகொள்ள முயற்சி செய்யுங்கள்.

கவனிக்க வேண்டிய சில மாற்றங்கள்:

• தூக்கத்தில் மாற்றங்கள்
• உணவு உட்கொள்ளும் பழக்கத்தில் மாற்றங்கள்
• நீண்ட நேரம் சோகமாக இருப்பது
• மனநிலை மாற்றங்கள்
• பதட்டம் அல்லது பயம்
• பள்ளிக்குச் செல்ல மறுப்பது
• பள்ளி அல்லது வழக்கமான செயல்பாடுகளில் திடீர் சிரமம்
• வெளியே செல்ல விருப்பமின்மை
• முன்பு விரும்பிய செயல்களில் ஆர்வம் குறைதல்
• உறவுகளில் பிரச்சினைகள்
• நடத்தையில் மாற்றம்
• சமூகத்திலிருந்து விலகி இருப்பது

எப்போது கூடுதல் உதவி பெற வேண்டும்?

குழந்தையில் காணப்படும் மாற்றங்கள் தொடர்ந்து நீடித்தால், அதிகரித்தால் அல்லது பள்ளி, குடும்பம், நண்பர்கள் மற்றும் அன்றாட வாழ்க்கையில் பாதிப்பை ஏற்படுத்தினால், தொழில்முறை உதவியைப் பெறுவது நல்லது.

பிரச்சினை மிகவும் தீவிரமாகும் வரை காத்திருக்க வேண்டிய அவசியமில்லை.

தேவைக்கேற்ப பின்வரும் நபர்களை அணுகலாம்:

• Teacher / School Counsellor
• Psychologist / Counsellor
• Psychiatrist

சரியான நேரத்தில் சரியான உதவியைப் பெறுவது பிரச்சினை மேலும் தீவிரமடைவதைத் தடுக்க உதவக்கூடும்.